- Tíðindi, mentan og ítróttur
Fimta dagin á rað: Fleiri nýggir tilburðir
![](https://kvf.fo/sites/default/files/styles/grein-ovasta-mynd/public/covid-19_corona_coronavirus.png?itok=XHgbkS4e)
Seks nýggir tilburðir av koronu vórðu staðfestir í Føroyum leygardagin, og higartil er ein tilburður staðfestur sunnudagin.
Tað upplýsir landslæknin, nú royndirnar frá leygardegnum eru liðugt greinaðar og byrja er at greina kanningarnar frá sunnudegnum.
Lars Fodgaard Møller, landslækni, sigur við útvarpið, at tað gongur rætta vegin nú, men hann leggur dent á, at enn er neyðugt at vera á varðhaldi.
Mælir til at brúka
– Hendan støðan við koronu fer at halda fram í øllum førum eitt ár aftrat; til tann dag, vit hava eina koppseting. Tí mugu vit altíð vera á varðhaldi, tað mugu vit ikki gloyma.
– Tí tað eru ikki ferðafólk, ið hava borið smittuna til Føroya, men føroyingar, sum hava verið uttanlands, og útisetar. Tað er ólavsøkan og privatar veitslur, ið er orsøkin til verandi støðu, sigur landslæknin.
Og í tíðindaskrivi frá Heilsumálaráðnum mælir landslæknin eisini til, at fólk brúka masku.
– Sum støðan er í løtuni, meti eg tað vera sera hóskandi, at vit brúka maskuna, tá vit til dømis eru til handils, ella tá vit eru innandura, har fleiri fólk savnast, sigur landslæknin.
Útlendingarnir staðfestir frískir
Samstundis, sum sjey nýggir tilburðir vórðu skrásettir í dag frá royndunum leygardagin, eru 10 persónar staðfestir frískir frá sjúkuni.
Talan er um teir útlendingarnar, sum fingu staðfest smittuna í samband við, at trý skip lógu við bryggju í Ánunum í Klaksvík upp undir ólavsøku. Hesir eru allir farnir av landinum aftur.
Sostatt eru 88 fólk smittað í løtuni, og talan er í øllum førum um persónar, sum hava føroyskt p-tal. Í løtuni verður arbeitt við at greina tær síðstu royndirnar frá sunnudegnum.