Hongkong: Kendur stríðsmaður leyslatin aftur

Jimmy Lai varð tikin mánadagin, tí hann skuldi hava samstarvað við útlendsk áhugamál og fyri svik, og hann mátti kortini leggja nógvar pengar á borðið, áðrenn hann varð latin leysur

Lai er ein av teimum í Hongkong, sum hevur funnist mest at kinesisku framferðini í landinum, og varð tikin eftir nýggju trygdarlógini, sum kinesarar settu í verk í Hongkong tíðliga í summar.

Jimmy Lai eigur blaðið, Apple Daily, og hevur umvegis blaðið funnist hvassliga at kinesisku framferðini. Hann varð tikin saman við tveimum synum og minst seks øðrum monnum, skrivar AFP.

 >> SÍ EISINI Hongkong: Kendur stríðsmaður tikin

Hann varð eisini tikin í februar og skuldsettur fyri at hava verið við í eini ólógligari mótmælisgongu í august í fjør. Hann varð eisini tikin í 2014, eftir at hann noktaði fyri at fara úr eini mótmælisgongu fyri demokrati í Hongkong.

Seinast í juli tóku myndugleikarnir fýra ungar mans, og teir vóru teir fyrstu sum vórðu tiknir eftir trygdarlógini, og teir vóru tiknir, hóast teir ikki mótmæltu.

Amerikanski uttanríkisráðharrin, Mike Pompeo, og trygdarráðgevin, Robert O´Brien, hava báðir mótmælt kinesisku framferðini ímóti teimum sum stríðast fyri demokrati í Hongkong.