Nú eru somu reglur í báðum skipanum

Fólkapensjónistar, sum ikki vóru á lønarískoytisskipanini, tá hon var í gildi fyrru ferðina, kunnu ikki koma upp í hana nú, hon kemur í gildi aftur frá 1.juli at rokna.

Tann broytingin varð gjørd í løgtinginum í gjár.

Trivnaðarnevndin mælti til at gera broytingina.

Orsøkin er, sigur formaðurin í nevndin, Uni Rasmussen, at hetta er galdandi fyri hina lønarískoytisskipanina, fyri hana, sum er galdandi fyri tey, sum eru yngri enn 67 ár.

Tað rætta er, at somu reglur eru fyri báðar skipanir.

Tað merkir, at fólkapensjónistar, sum missa arbeiðið 1.juli, ella eftir tað, ikki fáa lønarískoyti.

Lógin, sum bleiv samtykt í gjár, er tí bara galdandi fyri tey, sum fingu lønarískoyti eftir lógunum, sum fóru úr gildi 30.juni.