Pakistanar royna kinesiskt koppingarevni

Myndugleikarnir í Pakistan boða frá, at teir hava givið heilsuverkinum loyvi at royna eitt kinesiskt koppingarevni fyri koronau.

Tað skrivar franska tíðindastovan, AFP.

Koppingarevnið verður roynt á triðja stigi, sum er tað seinasta, áðrenn evnið endaliga verður góðkent at nýta til fólk.

Koppingarevnið verður eisini roynt í øðrum londum, í Kina, Russlandi, Kili, Argentina og í Saudiarabia, upplýsa pakistansku myndugleikarnir.

6.000 fólk deyð

Koppingarevnið, sum nú verður roynt, er ment á tveimum stovnum í Kina.

Meir enn 6.000 fólk eru deyð í Pakistan av koronuvirusinum, vísir ein uppgerð hjá myndugleikunum.

- Vónandi fer royndin at hava við sær, at koppingarevnið verður klárt um tríggjar til fýra mánaðir, sigur Abdul Bari, sum er stjóri á stóra Indus sjúkrahúsinum í Karachi, við AFP.