Býráðið valt sítt umboð í Leiklistarráðið

Tórshavnar býráð hevur valt Jóan Petur Hentze, trivnaðarstjóra, aftur í Leiklistaráðið árini 2020-2023.

Í Leiklistaráðnum eru sjey fólk, sum landsstýrismaðurin í mentamálum setir. Leiklistaráðið er í lógini um Tjóðpall Føroya.

Leiklistaráðið setir stjóra og loysir úr starvi stjóra á Tjóðpallinum.

Fýra fundir um árið

Leiklistaráðið hevur minst fýra fundir um árið, har leikskrá, fíggjarstøða, fíggjarætlan og onnur mál av týdningi fyri Tjóðpallin og leiklist sum heild verða umrødd.

Leiklistaráðið góðkennir fíggjarætlanina hjá Tjóðpallinum og staðfestir virksemi stovnsins eftir tilmæli stjórans.

Tað skal eisini tryggja samstarvið millum Tjóðpallin, Meginfelag áhugaleikara Føroya, aðra leiklist og onnur lista- og mentanarøki og ráðgeva landsstýrismanninum í leiklistaligum spurningum.

Leiklistaráðið ger tilmæli til landsstýrismannin um stuðul til yrkisleiklist.