Arbeiðaraflokkurin fær frammaná

Norski Arbeiðaraflokkurin fær ein frammaná í seinastu meiningakanningini, sum Opinion hevur gjørt fyri fleiri norskar miðlar.

Úrslitið er tað vánaligasta, síðani Opinion í 2007 fór at gera slíkar kanningar.

Arbeiðaraflokkurin hevði fingið 19,9 prosent av atkvøðunum, um val var nú. Tá ein líknandi kanning varð gjørd í august, fekk Arbeiðaraflokkurin 24,6 prosent, skrivar NTB.

- Tað sær ikki gott út hjá Arbeiðaraflokkinum, og talan er um eitt sera vánaligt úrslit, sigur valgranskarin, Johannes Bergh.

Hevði val verið, so hevði úrslitið hjá Arbeiðaraflokkinum verið tað vánaligasta í næstan 100 ár, ella síðani í 1924.

Órógv í flokkinum

Floksskrivarin hjá Arbeiðaraflokkinum, Kjersti Stenseng, sigur við NTB, at órógvið, sum hevur verið innanhýsis í flokkinum seinastu tíðina, uttan iva er orsøkin til vánaliga úrslitið.

Hóast Arbeiðaraflokkurin fær eitt søguliga vánaligt úrslit, so hevði vinstravongurin í norskum politikki vunnið valið, um val var nú.

Høgriflokkurin hjá Ernu Solberg, forsætisráðharra, hevði fingið 27 prosent av atkvøðunum, um val var nú, og hevði verið størsti flokkurin í stórtinginum. Men av tí at stuðulsflokkarnir hava afturgongd, hevði stjórnin ikki fingið meiriluta, skrivar NTB.

Stórtingsval verður í Noregi um eitt ár.