Nú verður farið at bora til Dals

Fyrst í næsta mánaði fer Landsverk undir at bora tunnilin til Dals. 

Tað upplýsti Jørgen Niclasen, landstýrismaður í samferðslumálum, í svari til Jóhannis Joensen, løgtingsmann úr Javnaðarflokkinum, tá munnligir fyrispurningar vóru á skránni í løgtinginum í dag.

Umframt tunnilin, sum verður 2,2 kilometrar langur, skulu 200 metrar av vegi gerast Húsavíkarmegin og 100 metrar Dalsmegin.

Níggju milliónir krónur eru settar av til Dalstunnilin í ár, og Jørgen Niclasen sigur, at klárar Landsverk ikki at brúka allan peningin, verður óbrúkta upphæddin flutt til næsta ár.

Í juli mánaði segði Sigurd L. Lamhauge, stjóri á Landsverki, at við verandi játtan, har níggju milliónir krónur verða játtaðar um árið, fer tað at taka umleið seks ár at bora tunnilin til Dals.