Pensjónistar fáa bíligari heimatænastur

Tað skal ikki vera ein fíggjarligur bági hjá pensjónisti at vera giftur. Og tey, sum forvinna minst, skulu ikki rinda fyri heimatænastur.

Elsebeth Mercedis Gunnleygsdóttir, landsstýriskvinna í almannamálum hevur saman við kommununum gjørt av at broyta gjøldini fyri heimatænastur.

Inntøkumarkið fyri, nær pensjónisturin sjálvur skal rinda fyri heimatænastur, verður hækkað. 

Inntøkumarkið hækkar

Inntøkumarkið verður hækkað úr 15.000 krónur upp í 50.000 krónur. Tað merkir, at tey, sum hava lægstu inntøkurnar, rinda ikki fyri heimatænastur.

Munur verður heldur ikki gjørdur á giftum og ógiftum pensjónistum. Prísurin á heimatænastum hækkar ikki, hóast hjúnafelagin forvinnur pening.

Kunngerðin varð lýst í gjár, og broytingarnar koma í gildi 1. januar 2021.