Hava smáligan fiskiskap

Fimm línuskip eru á landgrunninum. Tey fiska mest av toski og hýsu, og so nakað av longu og brosmu. Fiskiskapurin er smáligur.

Tað sigur Fiskamarknaður Føroya í meting fyri hesa vikuna.

Streymurin verður góður hesa vikuna, og veðrið verður eisini hampuligt. Tí roknar Fiskamarknaðurin við nakað av útróðri. Bátarnir fáa mest av hýsu og so toski.

Bara ein djúpvatnstrolari er til fiskiskap, og hann roynir eftir kongafiski vestanfyri.

Allir partrolararnir uttan tveir eru til fiskiskap. Øll pørini fiska upsa, men fiskiskapurin er smáligur.

Allir trolbátar liggja við bryggju.

Tvey garnaskip fiska svartkalva, og fiskiskapurin er smáligur. Eitt fiskar havtasku og hevur brúkiligan fiskiskap, sigur Fiskamarknaðurin í meting fyri hesa vikuna.