Finnast at innanhýsis eftirliti á Landsverki

Løgtingsgrannskoðararnir finnast hvassliga at mannagongdini í sambandi við at útbyggja Landssjúkrahúsið.

Løgtingsgrannskoðararnir halda tað als ikki vera nøktandi, at innanhýsis eftirlitið og eftirlitsfrágreiðingarnar hjá Landsverki ikki verða gjørdar regluliga og latnar bygginevndini. 

Teir átala hvassliga, at stórir manglar hava verið í fíggjarstýringini, og at disponeringarnar ikki eru greiðar.  

Løgtingsgrannskoðararnir ásanna, at tiltøk eru sett í verk, soleiðis at skilt verður í millum bundnar útreiðslur og væntaðar útreiðslur. 

Landsverk broytir mannagongdir

Landsverk gevur stjóranum í Sjúkrahúsverkinum rætt í, at tað ikki er nøktandi, at innanhýsis eftirlitið hjá Landsverki ikki hevur verið gjørt eftir føstum tíðarleisti, so Sjúkrahúsverkið altíð kann fáa dagførdar eftirlitsfrágreiðingar frá  Landsverki. 

Arbeiðið at rætta tað er á veg. 

Landsverk arbeiðir við at broyta mannagongdir og stýringaramboð, so orðingin ”disponering” bara verður brúkt um upphæddir, sum eru bundnar, og skulu rindast. 

Landsstýrismaðurin í heilsumálum hevur greitt frá, at Heilsumálaráðið fer at viðgera viðurskiftini saman við Landssjúkrahúsinum.