Landskassin missir góðar 160 mió. kr.

Løgtingsgrannskoðararnir átala hvassliga, at einki skipað eftirlit hevur verið fyri at halda lív í krøvunum, og at landskassin tí má avskriva slakar 161 mió.kr. í effektivum veðhaldsútreiðslum.

Talan er um landskassaveðhald frá 1980-unum í fiskivinnuni. 

Landið noyddist at leggja út 1,6 milliardir krónur, tí veðhaldini gjørdust effektiv.

185,5 mió. kr. hjá 104 skuldarum eru til innheintingar, men 160,8 mió. kr. eru fyrnaðar. Eftir eru 24,7 mió. kr. hjá 45 skuldarum.

56 viðmerkingar og átalur

Løgtingsgranskoðararnir átala hvassliga, at ikki er forðað fyri, at landskassin missir góðar 160 mió. kr.

Løgtingsgrannskoðararnir hava grannskoðað landsroknskapin fyri 2019 við støði í frágreiðingum frá Landsgrannskoðanini og privatum grannskoðarum. 

Teir hava 56 viðmerkingar og átalur í uppskotinum til samtykar, sum er lagt fyri løgtingið.