Rasmus Prehn nýggjur matvøruráðharri

Rasmus Prehn verður nýggjur matvøruráðharri í Danmark eftir Mogens Jensen, sum hevur lagt frá sær í kjalarvørrinum av minkagøluni. Hann fer eisini at umsita landbúnað og fiskivinnu.

Rasmus Prehn hevur frammanundan verið ráðharri fyri menningarsamstarv.

Mette Frederiksen, forsætisráðharri, hevur gjørt av at liða umhvørvis- og matvørumálaráðið sundur.

Flemming Møller Mortensen verður ráðharri fyri menningarsamstarv og norðurlendskt samstarv.

Mogens Jensen var eisini ráðharri í javnstøðumálum, men hetta málsøkið verður nú flutt í arbeiðsmálaráðið, har Peter Hummelgaard er ráðharri.

Umhvørvis- og matvørumálaráðið broytir navn til umhvørvismálaráðið, har Lea Wermelin er ráðharri.