- Tíðindi, mentan og ítróttur
Føroyingar í Danmark fáa eisini Arne-pensjón
![](https://kvf.fo/sites/default/files/styles/grein-ovasta-mynd/public/peter_hummelgaard.jpg?itok=butpD377)
Føroyingar í Danmark kunnu fara av arbeiðsmarknaðinum eftir somu fortreytum sum ES-borgarar í sambandi við Arne-pensjónina, sum hon verður nevnd.
Tað sigur Peter Hummelgaard, ráðharri í arbeiðsmarknaðarmálum, í svari til Sjúrð Skaale, fólkatingsmann.
Sambært Arne-pensjónsskipanini kunnu fólk, sum hava verið á arbeiðsmarknaðinum í 42, 43 ella 44 ár, fáa pensjón ávikavist eitt, tvey og trý fyrr.
Føroyingar og grønlendingar ikki við
Men upprunaliga uppskotið legði ikki upp fyri, at fólk, sum starvast í Føroyum og Grønlandi, kundu telja ta starvstíðina við í samlaða starvsaldurin fyri at fáa Arne-pensjón, eins og tey, sum hava starvast í ES- og EBS-londum.
Peter Hummelgaard sigur, at hann hevur havt samband við landstýrið um málið, og landstýrið hevur boðað frá, at tey vilja, at starvsaldurin í Føroyum telur við. Tí verður uppskotið broytt, so starvstíðin í Føroyum og Grønlandi telur við, tá starvsaldurin skal roknast.
Arne-pensjónin verður tó ikki útgoldin til fólk, sum búgva í Føroyum, men bara til fólk, sum búgva í Danmark, ES- og EBS-londum, umframt Sveis, Bretlandi og Turkalandi, sigur arbeiðsmarknaðarmálaráðharrin í svarinum til Sjúrð Skaale.