Lækkar markið fyri negativari rentu á nýggjárinum

Eigur tú fleiri enn 250.000 krónur á bók í Banknordik, so kanst tú vænta at rinda negativa rentu fyri at hava pengarnar innistandandi.

Banknordik broytir upphæddina, sum er undantikin negativari rentu, á nýggjárinum - úr 500.000 krónum til 250.000 krónur.

 - Samstundis verður negativa rentan lækkað úr minus 0,75 % til 0,60 prosent, skrivar bankin á heimasíðuni.

Umframt hámarkið, ið er 250.000 krónur, ber til at hava upp til tvær aðrar kontur við 50.000 krónum á - uttan at rinda negativa rentu.

Um kundar hava fleiri enn tríggjar vanligar innlánskontur, verður negativ renta goldin av hesum kontum, stendur á heimasíðuni hjá Banknordik.

Tó eru børn og ung undir 29 ár undantikin negativum rendum.

Sambært yvirliti á heimasíðuni hjá hinum bankanum - Betri Banki , Norðoya Sparikassa og Suðuroyar Sparikassa - er hámarkið har framvegis 500.000 krónur fyri at sleppa undan at rinda negativa rentu.