Hallið verður hálvthundrað milliónir

Tað fer at kosta slakar hundrað milliónir krónur at reka Eysturkommunu næsta ár. Býráðið hevur samtykt fíggjarætlanina fyri 2021.

Inntøkurnar eru 119,5 milliónir krónur. Raksturin kostar 98 milliónir krónur, 3,9 prosent meira enn í ár.

Talan er um lønarhækking og fleiri pengar til eldrasamstarvið Nánd. Ætlanin er at gera íløgur fyri 62 milliónir krónur í 2021.

Stór íløga

Størsta íløgan, 30 milliónir krónur, er í dagsstovnin við Gøtugjógv. 10 milliónir fara til at byggja út eldrasambýlið Giljagarð í Leirvík, fimm milliónir eru settar av til sjóhitaverkætlanina í Leirvík og fýra milliónir til útstykking í Leirvík. 

Avdráttirnir í 2021 verða 7,8 milliónir krónur, og ein millión krónur fara til rentur næsta ár. Hallið hjá Eysturkommunu verður 50,7 milliónir krónur næsta ár.

Skattaprosentið verður óbroytt 21, og barnafrádrátturin verður eisini óbroyttur, 8.000,00 krónur.