Letur upp fyri ferðslu á middegi leygardagin

Eysturoyartunnilin letur upp fyri almennari ferðslu á middegi leygardagin.

Ein tíma frammanundan, klokkan 11, verður skipað fyri hátíðarhaldi fyri innboðin við rundkoyringina í tunlinum. 

Har verða hornblástur og røður hildnar.

Millum røðararnar verða Jørgen Niclasen, landsstýrismaður í samferðslumálum, Tróndur Patursson, listamaður, sum greiðir frá listaverkinum í rundkoyringini, og Bergur Poulsen, nevndarformaður í partafelagnum Eysturoyar- og Sandoyartunlar.

Eyðun Eliasen fer at greiða frá arkitekturinum í sambandi við portalar og ljósseting, og Jens L. Thomsen fer at greiða frá ljóðmyndini, sum verður at hoyra í tunlinum.

Annika Olsen, borgarstjóri í Tórshavnar kommunu, og borgarstjórarnir í kommununum við Skálafjørðin, Tórbjørn Jacobsen, Artur Johansen og Johannes Danielsen fara eisini at halda røðu.

Hátíðarhaldið verður sent bæði í útvarpinum og sjónvarpinum.

Jørgen klippir snórin

Hátíðarhaldið við rundkoyringina endar við, at Jørgen Niclasen, landsstýrismaður, slippir snórin og verður tann fyrsti at koyra í tunlinum, eftir at hann er tikin alment í nýtslu.

Á middegi - klokkan 12 - letur Eysturoyartunnilin upp fyri almennari ferðslu.

Seinastu dagarnar eru ymsar royndir gjørdar í tunlinum, og tær hava eydnast væl. 

Í kvøld verður ein bjargingarroynd, og hon verður tann seinasta, sum verður gjørd, áðrenn Eysturoyartunnilin letur upp leygardagin.

Tað verður ókeypis at koyra í tunlinum til nýggjárs. 

Í dag vóru borgarstjórarnir í Havn og í kommununum við Skálafjørðin eftir 1. januar í Eysturoyartunlinum og skoðaðu verkið. Bjarni Árting Rubeksen tók myndirnar. 

Súni í Hjøllum

Eysturoyartunnilin

Torbjørn Jacobsen, Heðin Mortensen

Teitur Samuelsen, Jørgen Niclasen

Heðin Mortensen, Torbjørn Jacobsen, Artur Johansen, Eysturoyartunnilin