Nýggj Unesco-nevnd sett

Ein nýggj føroysk Unesco-nevnd er sett.

Unesco er ST-stovnurin fyri útbúgving, vísindi, mentan og samskifti.

Í nevndini eru Herleif Hammer, stjóri á Tjóðsavninum, sum er formaður, Annika Sølvará, stjóri í Granskingarráðnum, Eilif Gaard, stjóri í Havstovuni, Annika Smith, landsbókavørður, Elsbet Heðinsdóttir Christiansen fyri Føroya ungdómsráð, og Margretha Jacobsen, fulltrúi í Uttanríkistænastuni.

Armgarð Weihe, fulltrúi í Uttanríkis- og Mentamálaráðnum, er virkandi aðalskrivari hjá nevndini.

Nevndin er tilnevnd fyri fýra ár.  

Triðja nevndin

Hetta er triðja Unesco-nevndin, síðani Føroyar fingu atlimaskap í Unesco í 2009.

Á fyrsta fundinum hjá nýggju nevndini varð føroyskur limaskapur í IOC umrøddur. IOC er havgranskingarnevnd hjá Unesco. 

Eisini varð føroyskur heimsarvur og ein føroysk geopark umrødd.

Nýggja nevndin fer eisini at arbeiða víðari við sáttmálanum um at verja siðaarv, sum undanfarna Uncesco-nevnd arbeiddi við.

Løgtingið samtykti í 2018 at taka undir við sáttmálanum.