Endurgjaldslóg úr gildi

Lógin fór úr gildi á nýggjárinum, og uppskotið um at leingja hana til 31. desember 2025 er enn í Fíggjarnevndina, sum fekk uppskotið 10. desember.

Talan er um lógina um at endurrinda meirvirðisgjaldið, tá fólk keypa elbil, hitapumpu ella byggja ella umbyggja ávísar leigubústaðir.

Markið er 70.000 krónur

Tey, sum keypa orkuvinarligan bil, kunnu fáa í mesta lagi 70.000 krónur aftur, um bilurin kostar 350.000 krónur við meirvirðisgjaldi.

Tey, sum byggja ella umbyggja hús at leiga út, kunnu fáa meirvirðisgjaldið aftur, um tey brúka meira enn 200.000 krónur uttan meirvirðisgjald til byggingina. 

Treytin er, at minst tveir leigubústaðir verða gjørdir, og í minsta lagi ein til fólk í koyristóli.