Einki koppingarevni frá Moderna til Føroya

Fyrstu skamtarnir av koronukoppingarevni frá fyritøkuni Moderna koma til Danmarkar í morgin, skrivar Ritzau-tíðindastovan.

Talan er um 5.000 skamtar, men eingin skamtur kemur til Føroya. Tað sigur Hjalti Gunnarstein, landsapotekari, við útvarpið.

Meira frá Pfizer/BioNTech

Av tí at tað bara eru 5.000 skamtar í fyrstu atløgu, hevur Serumstovnurin avgjørt at brúka allar skamtarnar í Region Suðurdanmark, skrivar Ritzau.

Næstu vikurnar koma fleiri skamtar frá Moderna til Danmarkar, men Hjalti Gunnarstein, landsapotekari, veit ikki, nær tær fyrstu av hesum koma til Føroya.

Hann væntar tó, at næsta sending av koppingarevninum frá Pfizer/BioNTech kemur til Føroya í morgin. Tá koma aftur 975 gløs við koppingarevni, sum røkka til 1.300 fólk.