Fólkatalið vaks í seks útoyggjum

Í flestu útoyggjunum vaks fólkatalið í fjør.

Sambært nýggjastu tølunum frá Hagstovuni um fólkatalið, sum eru frá 1.desember í fjør, minkaði fólkatalið í trimum oyggjum.

Í Koltri minkaði tað 100 prosent. Tí 1.desember í 2019 var eitt fólk skrásett at búgva í Koltri. 1.desember í fjør búði eingin har.

Í Svínoy vóru tvey fólk færri, og í Kunoy vóru tíggju fólk færri 1.desember í fjør enn árið fyri.

Annars vaks fólkatalið í øllum oyggjum uttan í Stóru Dímun, har tað stóð í stað.

Í Fugloynni vóru trý fólk fleiri, í Hesti og Mykinesi kom eitt fólk afturat, í Kalsoynni fimm, í Skúgvoy trý, og í Nólsoy vóru 11 fleiri fólk 1.desember í 2020 enn 1.desember í 2019.