Koppsetingarætlanin er nú lýst

Kunngerðin fevnir bara um koppseting av starvsfólki í heilsu- og eldraverkinum, partar av almannaverkinum, búfólk á ellis- og røktarheimum, sjúklingar í vandabólkum og teirra avvarðandi, 65 ára gomul og eldri við tørvi á persónligari røkt, umframt fólk 85 ár og eldri.

Tað hevur sína orsøk, at kunngerðin ikki fevnir um aðrar bólkar í samfelagnum, sigur landsstýrismaðurin í heilsumálum.

– Trýstið at fáa koppsetingina er ov stórt í mun talið av koppsetingum, og tí verður atgongdin avmarkað við kunngerð, sigur Kaj Leo Holm Johannesen.

Heilsumyndugleikarnir vænta at vera lidnir við at koppseta føroyingar, tá ið juni mánaður fer at halla. Tað er samstundis sum danir eru lidnir við sína koppseting.