Ber ikki til at býta um grundstykki

Løgtingins umboðsmaður tekur undir við Kommunala eftirlitinum, sum segði, at ikki bar til at býta um grundstykki við Klingurstjørn 2.

Fyrst noktaði Tórshavnar kommuna umsøkjaranum at býta um grundstykki.

Men so fór málið á býráðsfund, har býtið bleiv samtykt við sjey atkvøðum fyri og seks ímóti.

Borgarstjórin kærdi til Kommunala eftirlitið, sum ógildaði meirilutan á býráðsfundinum.

Kommunala eftirlitið gav borgarstjóranum viðhald.

Kærdi til Umboðsmannin

Tann, sum ætlaði at býta um grundstykki, kærdi til Løgtingsins umboðsmann, sum tó staðfesti avgerðina hjá Kommunala eftirlitinum.

Umboðsmaðurin segði eisini, at málsviðgerðin hjá Tórshavnar kommunu, í sambandi við umsóknir um umbýti av grundstykkjum, als ikki samsvaraði við tað, sum kann væntast av einum myndugleika í sambandi við málsviðgerð av fyrisitingarligum avgerðum, so sum at skjalføra allar viðkomandi upplýsingar. 

Løgtingsins umboðsmaðurin gav Tórshavnar kommunu eina átalu.