Samráðingar um samgongu í Grønlandi slitnaðar

Samráðingarnar um nýggja samgongu í Grønlandi eru slitnaðar. Eingin flokkur vil taka av tilboðnum frá formanninum í Siumut, Erik Jensen. Enn hevur tó ikki verið fundur við Atassut.

Samgongan hjá Siumut er í minniluta, eftir at Demokratarnir fóru úr samgonguni mánadagin.

Siumut hevur tosað við allar flokkarnar, sum eru í andstøðu, uttan við Atassut, men eingin tók av tilboðnum um at koma upp í samgonguna.

Samgongan hjá Siumut og Nunatta Qitornai hevur 11 av 31 landstingslimum. Fyri at hava meiriluta hevur ein samgonga brúk fyri í minsta lagi 16 tinglimum.

Vetrarsetan byrjar týsdagin

Landstingið kemur saman týsdagin, tá ið vetrarsetan byrjar. Tá kann Kim Kielsen lata sessin sum landsstýrisformaður frá sær til Erik Jensen.

Møguleiki er eisini fyri uppskoti um misálit á Kim Kielsen. Verður tað samtykt, verður val í Grønlandi.

Demokratarnir og IA siga, at innanhýsis ósemjan í Siumut er ov stór til, at tey tíma at arbeiða saman við teimum.

Ósemjan er um eitt nám í Narsaq í Suðurgrønlandi, sum nýggja leiðslan í Siumut ikki vil stuðla treytaleyst longur.