Nógv verri úrslit í 2020

Í fjórða ársfjórðingi í fjør hevði Bakkafrost samtakið 37,7 milliónir krónur í halli. Í sama ársfjórðingi í 2019 hevði samtakið 220 milliónir krónur í vinningi.

Tøkan í fjórða ársfjórðingi í Føroyum og í Skotlandi var 25.262 tons í kruvdari vekt, 15.957 tons í Føroyum og 9.305 tons í Skotlandi.

Bakkafrost ætlar at taka 106.000 tons í ár. Tøkan í fjør var 85.686 tons. Nettoskuldin hjá Bakkafrosti var ein milliard og 752,8 milliónir krónur, tá 2020 endaði. Hon var ein milliard og 18,7 milliónir árið fyri. 

Á ársaðalfundinum, sum verður 9. apríl, fer nevndin at skjóta upp, at 3,65 krónur verða latnar í vinningsbýti fyri hvørt partabræv.