Fýra limir taka ikki við afturvali

Fýra nevndarlimir í BankNordik taka ikki við afturvali á aðalfundinum, sum verður 26. mars. 

John Henrik Holm, Barbara P. Vang, Gunnar Nielsen og Hans Arni Bjarnason Thomsen hava boðað aðalfundinum frá, at tey stilla ikki uppaftur.

Tí er greitt, at bara verandi nevndarformaður, Ben Arabo, og Jógvan Jespersen, stjóri í Felagnum Nótaskip, halda fram eftir aðalfundin.

Johanna Lava Køtlum nýggjur nevndarlimur

Nakrir av størstu eigarunum í BankNordik - Fíggingargrunnurin frá 1992, Lind Invest ApS, Protector Forsikring ASA, P/F Tjaldur og P/F Framherji - skjóta upp at velja Sverre Bjerkeli, Jóhonnu Lava Køtlum og Michael Ahm í nevndina.

Sambært viðtøkunum skal aðalfundurin velja millum fýra og seks nevndarlimir. Tey vóru seks frammanundan, eftir aðalfundin vera tey fimm. Harumframt eru trý starvsfólkavald umboð í nevndini.

Sverre Bjerkeli er úr Norra. Hann er stjóri í Protector Forsikring. 

Michael Ahm er úr Danmark. Hann er adjunktur við Handilsháskúlan í Keypmannahavn.

Jóhanna Lava Køtlum er stjóri í Fiskaaling. 

48 mió. kr. í vinningsbýti

Aðalfundurin skjýtur eisini upp at útluta fimm krónur í vinningsbýti fyri hvørt partabrævið í bankanum. Tað gevur tilsamans 48 milliónir krónur í vinningsbýti til eigararnar.

Tað eru stívliga 29 prosent av yvirskotinum í fjør, sum er gjørt upp til 166 milliónir krónur.