Fara nú at seta landbúnaðarráðgeva

Skjótt verður landbúnaðarráðgevi settur. Umsóknarfreistin var til 1.mars.

Tróndur G. Leivsson, stjóri á Búnaðarstovuni, vil ikki siga, hvussu nógvar umsóknir komu. Men umsóknir eru, sigur hann.

Rólvur Djurhuus var landbúnaðarráðgevi. Hann gavst í fjør summar. 

Fyrst í hesum árinum fekk Búnaðarstovan eina reglugerð um landbúnaðarráðgeva. Slík reglugerð hevur ikki verið áður.

Til starvið sum landbúnaðarráðgevi krevst førleiki á hægri universitetsstigi sum landbúnaðarfrøðingur, við sergrein í evnum, sum eru viðkomandi fyri føroyskan landbúnað. 

Formligur granskingarførleiki er ein fyrimunur. 

Dentur verður lagdur á verkligar førleikar, og gott innlit í føroysk landbúnaðarviðurskifti hevur eisini stóran týdning, stendur í starvslýsingini.