Hasfjord hevur mist 20 dagar í sigling

Strandfaraskipið Hasfjord kostaði tað sama at gera siglingarklárt sum at keypa.

Hasfjord kostaði 3,5 milliónir krónur, og skipið varð umvælt fyri 3,5 milliónir krónur, áðrenn tað fór at sigla í Føroyum.

Seinni eru brúktar tvær milliónir afturat til umvælingar og annað. Tað upplýsir Jørgen Niclasen, landsstýrismaður, í svari til Beintu Løwe, løgtingskvinnu.

Hevur mist 20 dagar

Hasfjord bar við botn í innsiglingini í Skopun 24. juni í fjør. Hasfjord fór í sigling aftur 21. juli.

Trupulleikar vóru við høvuðspumpuni til bógskrúvuna 19. februar í ár. Skipið fór aftur í sigling 2. mars.

Hasfjord siglir vanliga fýra dagar um vikuna í Skopunarfirði. Skipið hevur tí mist 20 dagar, sigur Jørgen Niclasen.