Koppseting í Norðurlondum: Føroyar á triðja plássi

Triðja hvørt fólk í Føroyum hevur nú í øllum førum fingið fyrra prikið fyri koronu. Føroyar eru á triðja plássi yvir øll Norðurlondini, sigur Koppsetingarbólkurin í triðju støðulýsingini, sum kom í gjár.

Tað er bara í Íslandi og Finnlandi, at fleiri fólk hava fingið fyrra prikið enn í Føroyum. Í Íslandi er talið 41 prosent og í Finnlandi er talið 35 prosent. Prosenttalið í Føroyum er 33 prosent.

Í gjár var áttanda hvørt fólk í Føroyum liðugt koppsett fyri koronu. Hetta er triðja støðulýsingin frá Koppsetingarbólkinum, og hon fevnir um tíðarskeiðið 25. mars til 11. mai 2021.