Signhild Joensen langt frá síni bestu tíð

Tað gekk ikki eftir ætlan hjá Signhild Joensen í dag. Svimjarin, sum hesa vikuna luttekur í evropameistarakappingini í Budapest, endaði nummar 44 av 48 í 100 metur ryggsvimjing við eini tíðini 1:04.72. Ein tíð, sum hon ikki var nøgd við.

– Eg svimji í roynd og veru nokkso langt frá míni bestu tíð, og tað hevði eg nokk ikki væntað, sigur Signhild Joeosen í samrøðu við Hörð J. Oddfríðarson úr Sundsamband Íslands, sum kann síggjast á svimjing.com.

– Eg havi havt nakrar góðar kappingar fyrr í ár, og tað er hart, at eg skal svimja meg til eina slíka tíð í dag til júst eina slíka kapping, sigur ryggsvimjarin, sum annars hevði sum mál at nærkast ella taka onkra av sínum bestu tíðum.

Signhild Joensen eigur sjálv føroyska metið uppá 1:03.01. Leygardagin skal Signhild Joensen svimja 200 metra teinin, og tað er samstundis síðsta kappingin hjá henni í EM-kappingini.

– Nú havi eg frí í morgin, so eg fari at venja, og vónandi verður tað betur leygardagin, sigur Signhild Joensen.