Tvøroyarar kommuna viðgongur feil

27 krónur fyri hvørt skalið. Tað var treytin, tá ein persónur bað um alment innlit. Og tann, sum bað um innlitið, fekk eingi skjøl. Hann slapp bara at síggja tey.

Tann, sum bað um innlitið, fær nú øll skjølini, sigur kommunan. 

Løgtingsins umboðsmaður bað Tvøroyrar kommunu viðgera av nýggjum eitt innlitsmál.

Kærdi avgerðina

Persónurin, sum bað um innlit, klagaði um málsviðgerð hjá Tvøroyrar kommunu og um, hvussu kommunan viðgjørdi umbønina um innlit.

Málið snúði seg um tilboð um at reka kantinuna í ítróttarhøllini í Trongisvági.

Tann, sum kærdi, fekk ikki raksturin. 

Tann, sum hevði raksturin, fekk hann aftur.

Valdu tryggu loysnina 

Kommunan valdi, sum hon segði, tryggu og kendu loysnina. Og tað heldur kommunan fast við.

Viðvíkjandi innlitsumbønini vísti umboðsmaðurin á, at 10 skjøl eru skrásett í málinum. Kommunan gav bara innlit í átta skjøl, men nevndi einki um hini tvey skjølini.

Umboðsmaðurin viðmerkti, at av tí at eingi avrit vórðu latin klagaranum, hevði Tvøroyrar kommuna heldur ikki neyðugu heimildina at krevja gjald fyri avrit í hesum føri.