3000 kr. í bót fyri at fara á matstovu í Nuuk uttan koppseting

Ein 60 ára gomul kvinna í Nuuk hevur fingið 3.000 kr. í sekt, tí hon var í einari matstovu, hóast hon ikki var liðugt koppsett og hóast hon ikki kundi prógva, at hon varð staðfest koronunegativ seinastu 48 tímarnar, upplýsir politiið í Grønlandi.

Korona hevur rættiliga gjørt vart við seg í Grønlandi seinastu tíðina.

Í gjár vóru 61 smittað. So stórt hevur talið ikki verið fyrr. 

Tvey prik

Reglan um tvey prik, sum er galdandi til 10. august, er eisini galdandi fyri eitt nú ítrótt, vertshús, mentanarstovnar og hárfríðkanarstovur.

Og øll, sum koma til Grønlands við flogfari úr Danmark, men ikki hava bústað í Grønlandi, skulu eisini hava fingið bæði prikini.

Ikki er nóg mikið at vísa negativa koronukanning í Kastrup. 

Hetta er galdandi frá 10. til 24. august.