Stakk seks fólk í Ný Sælandi

Løgreglan í Ný Sælandi hevur skotið og dripið ein mann, eftir at hann stakk seks fólk í einum handilshúsum í størsta býnum, Auckland.

Sambært forsætisráðharranum í landinum, Jacindu Ardern, var talan um eina yvirgangsatsókn. Sambært henni er maðurin ættaður úr Sri Lanka, og hann tók undir við framferðini hjá Islamskum Stati.

Hon sigur eisini, at trygdarløgreglan visti um mannin, og hevði eyguni eftir honum alt samdøgrið.

Sambært Ardern, var einki sum bendi á, at maðurin fór at fremja eina atsókn í dag.

Øll seks fólkini sum vórðu stungin, eru løgd inn á sjúkrahús, og hjá trimum av teimum er støðan ivasom.