Kommunufelagið: Lóg forðar ikki útlendingum at keypa fastogn

Lógaruppskotið hjá landsstýrinum um fastogn og útlendingar í Føroyum forðar ikki fyri, at útlendskar fyritøkur kunnu keypa fastogn í Føroyum sum teimum lystir, sama hvar bústaður teirra er.

Tað sigur Kommunufelagið um uppskotið hjá landsstýrinum, sum eftir ætlan landsstýrisins skal forða fyri, at fólk, sum ikki búgva í Føroyum, keypa hús og jørð í Føroyum.

Kommunufelagið sigur, at onnur tiltøk mungu gerast, so útlendskar fyritøkur og útlendsk vinnufeløg ikki ótarnað kunnu keypa fastogn í Føroyum.

Felagið heldur eisini, at ein neyvari greining eigur at gerast, sum millum annað umfatar royndirnar hjá grannalondunum, áðrenn lógaruppskot verður gjørt um fastogn og útlendingar.

Kommunufelagið heldur, at útlendsk feløg og einstaklingar eiga at hava skattskyldu í Føroyum, skulu tey eiga fastogn her.