Kunnu fiska 900.000 tons av lodnu

Íslendska havstovan mælir til, at fiskast kunnu 904.000 tons av lodnu í næstu vertíð, 2021-2022.

Tilmælið verður endurskoðað fyrst í komandi ári. 

Gýtingarstovnurin er nú stív 1,8 milliónir tons. Havstovan hevur boðað frá, at útlitini fyri árini 2022 og 2023 eru eisini góð.  

Føroyar eiga fimm prosent

Lodnan í íslendskum sjógvi er komin fyri seg. Tað er ikki so langt síðani, at eingin lodna yvirhøvur var fiskað.

Í seinastu vertíð, 2020-2021, vóru fiskað 128.600 tons av lodnu. Einki var fiskað í 2020. 

Føroyar eiga fimm prosent av íslendsku lodnukvotuni, tó í mesta lagi 30.000 tons.