Atkvøða í dag um at selja Magn

Í dag klokkan fimm seinnapartin okkara tíð fara partaeigararnir í íslendska oljufelagnum Skeljungi at atkvøða um uppskotið hjá nevndini um at selja dótturfelagið í Føroyum, Magn.

Partaeigarafundurin verður í Reykjavík.

Fyrst í september boðaði Skeljungur íslendska keypsskálanum frá, at føroyska smápartafelagið, Orkufelagið, var í samráðingum um at keypa Magn. 

Miðað verður eftir, at endaliga avtalan verður klár í november. 

606 mió. kr.

Sambært fráboðanini er keypsprísurin 606 milliónir krónur í okkara peningi. 

Við í tí prísinum eru yvirtikin skuld og onnur fíggjarlig viðurskifti.

Skeljungur ætlar at selja Magn, tí felagið ætlar at minka oljusøluna og heldur leggja dent á aðrar orkukeldur.