Róku fyri vág og vind í ein mánað

Tveir menn vórðu í síðstu viku bjargaðir við Papua Ný Guinea eftir at hava rikið 29 dagar á havinum. Hetta skriva fleiri miðlar í dag.

Sambært netmiðlinum France24 fóru teir báðir Livae Nanjikana og Junior Qoloni úr Solomon-oyggjunum tann 3. september, men fáar tímar seinni kom illveður á teir.

Teir mistu landið úr eygsjón, og tá battaríið í GPS'aranum brendi út stutt seinni, valdu teir at sløkkja motorin fyri at spara upp á brennievni.

Regn og kokosnøtir

Fyrstu náttina stríddust teir móti illveðrinum og róku longri og longri út á havið.

Fyrstu níggju dagarnar livdu teir av appilsinum, teir høvdu við sær umborð, men tá tær blivu uppi, livdu teir av regnvatni og kokosnøtum, sum komu rekandi framvið.

Teir gjørdu eina mastur av árum og høvdu lørift til eitt segl og sigldu síðani við vindinum, sum førdi teir til Papua Ný Guinea. Har fingu teir samband við ein útróðarbát, og stutt seinni fingu teir aftur fast undir fótum, 29 dagar eftir at teir vóru farnir úr landi 400 kilometrar burturi.