Noreg ger flestar djóraroyndir í Evropa

Hagtøl frá norska Matvørueftirlitinum vísa, at laksur er greitt mest nýtta djór í djóraroyndum í Noregi, skrivar forskningsetikk.no.

1,7 milliónir laksar vóru nýttir til royndir við djórum í fjør. Tað svarar til 75 prosent av øllum djórum til kanningar.

Verða onnur fiskasløg roknað uppí, vóru í fjør 2,2 milliónir fiskar við í djóraroyndum.

Tore Kristiansen, granskingarleiðari á norska Havgranskingarstovninum, heldur, at talið kundi verið minni, men at tað gongur rætta vegin viðvíkjandi djóraroyndum.

"Í okkara mentan hugsa vit lítið um, hvussu fiskurin líður, og vit handfara hann, sum var tað grønmeti, men seinstu 10 árini hevur broyting eisini verið á hesum økinum," sigur hann, sambært NTB.