- Tíðindi, mentan og ítróttur
Mátingar á havbotninum eru framvegis ríkismál
![](https://kvf.fo/sites/default/files/styles/grein-ovasta-mynd/public/havbotnur2.png?itok=JuGy8toB)
Hóast Føroyar hava yvirtikið málsøkini sjókort og geodata, eru mátingar á havbotninum, sum hava uttanríkispolitiskan, trygdarpolitiskan og verjupolitiskan týdning, framvegis ríkismál.
Tað sigur Trine Bramsen, verjumálaráðharri, í svari til Sjúrð Skaale, fólkatingsmann.
Sjúrður Skaale spurdi, hví tey, sum ætla at gera mátingar til sjókort í Føroyum, skulu hava loyvi til tess frá donsku verjuni.
Skulu beina dátur burtur
Fyritøkan Wikmar í Havn, sum í nógv ár hevur kannað botnin í føroysku firðunum, hevur fingið boð um at burturbeina øll botndata, sum eru løgd út til almenna nýtslu síðani 1.januar 2020.
Trine Bramsen sigur, at mátingar til sjókort kunnu vera trygdarpolitiskt viðkvæmar, tí tær vísa kaðalar, sum eru á havbotninum. Og før úr fíggindalondum kunnu brúka tær.
Tí skal Verjumálaráðið geva loyvi til slíkar mátingar. Um aðrar mátingar enn til sjókort skulu gerast, kunnu føroyskir myndugleikar geva loyvi til tess, men bara eftir at hava spurt Verjumálaráðið.
Trine Bramsen sigur, at Verjumálaráðið tosar javnan við landsstýrið um hesi mál.