Mótmæla hermannastýrinum í Sudan

Stórar mótmælisgongur eru ímóti hernaðarstýrinum í Sudan. 

- Tað eru serliga tey ungu, sum eru vónbrotin av støðuni, sigur Berte Marie Ulveseter, sum umboðar Kirkens Nødhjælp í Sudan, við norska NRK.

Herurin brúkar táragass móti mótmælisfólkunum.

Ulveseter sigur, at tey, hon hevur tosað við, siga seg ikki fara at gevast við mótmælunum.

Kennir seg trygga

- Brúgvarnar um Nilánna eru ofta stongdar. Bankarnir hava latið aftur, og einki internet er, sigur hon.

Ulveseter sigur, at hon kennir seg trygga í Sudan, hóast hon er útlendingur. Men støðan hjá teimum lokalu starvsfólkunum er ótrygg. Støðan er óviss, og fólk meta um frá degi til dags, um tað er ráðiligt at møta til arbeiðis.

Eftir kvettið, sum var 25. oktober, hava fleiri mótmælisgongur verið. Í minsta lagi 14 fólk eru deyð, og nógv fleiri eru handtikin.

Tað eru fyrst og fremst ungfólk og kvinnur, sum mótmæla statskvettinum.