Boða nú eisini frá koronusmittu í sms-boðum

Hevur tú latið teg kannað fyri koronu á einum av kanningarstøðunum hjá Sjúkrahúsverkinum, fært tú nú eisini sms-boð, um úrslitið er positivt.

Tað boðar Sjúkrahúsverkið frá í dag.

Sagt verður í tíðindaskrivi, at tað er umráðandi, at fólk fáa boð skjótast gjørligt, tá koronukanningin er positiv.

Tí hevur Sjúkrahúsverkið í samráð við Landslæknaembætið gjørt tillagingar í bókingarskipanini soleiðis, at fólk, sum eru kannað positiv fyri koronu, fáa boð beinanvegin, tá kanningarúrslitini eru klár.

Fingu boð frá Landslæknanum

Fyrr hevur mannagongdin verið tann, at tey smittaðu fingu boð, tá Landslæknin setti seg í samband við tey. Nú smittutølini hava sett met, hevur tað tikið longri tíð hjá Landslækanum at fáa fatur á øllum.

Í boðunum frá Sjúkrahúsverkinum stendur úrslitið av kanningini, og at fólk verða biðin um at fara í sóttarhald. Landslæknin setur seg framvegis í samband við tey, ið eru smittað, við nærri kunning og leiðbeining.

Umframt at fáa sms-boð, verður ein váttan eisini send í telduposti.

Koronukanning, koronakanning, koronukvittan

Tillagingar eru gjørdar í bókingarskipanini soleiðis, at fólk, sum eru kannað positiv fyri koronu, fáa boð beinanvegin, tá kanningarúrslitini eru klár.