Uppskot gjørt um barnaváttan

Nú er gjørt eitt lógaruppskot um barnaváttan.

Barnaváttan skal verja børn móti kynsligum ágangi. 

Landsstovnar, kommunalir stovnar og privatir felagsskapir, bæði vinnufeløg og eitt nú ítróttarfeløg og samkomur, tað eru stutt sagt arbeiðsgevarar, skulu biðja um barnaváttan, áðrenn fólk kemur í beinleiðis og regluligt samband við børn undir 15 ár, sigur Uttanríkis- og Mentamálaráðið, har sum lógaruppskotið er gjørt.

Sagt verður eisini, at breið politisk semja hevur leingi verið um at krevja barnaváttan.

Serligt slag av revsiváttan

Ein barnaváttan er eitt serligt slag av revsiváttan, sum er avmarkað til upplýsingar um ávís lógarbrot.

Í einari barnaváttan eru ikki bara upplýsingar um dómar, men um allar avgerðir um kynslig brotsverk móti børnum, eisini avgerðir um ákærufráfall.

Barnaváttanarlógin skal koma í gildi 1.apríl næsta ár.

Uppskotið er sent til hoyringar, og hoyringarfreistin er til 9.desember.