30 mió. kr. úr ríkiskassanum til stórhøll í Hoyvík

Danska fólkatingið játtar 30 milliónir krónur til nýggju stórhøllina í Hoyvík, Føroya Arena.

Tað boða føroysku fólkatingsmenninir, Sjúrður Skaale og Edmund Joensen, frá í felags tíðindaskrivi.

Sambært fólkatingsmonnunum eru tær 30 milliónirnar úrslit av samráðingum við Nicolai Wammen, fíggjarmálaráðharra, nú danska fíggjarlógin fyri 2022 skal samtykkjast.

Peningurin er játtaður fyri árini 2022-2025. 

Ein treyt fyri at játta pengarnar er, at restin av fíggingini eisini fæst.

Mett at kosta 217 mió. kr. 

Higartil hevur Tórshavnar kommuna givið tilsøgn um at játta 109 milliónir krónur til stórhøllina, sum skal kosta 217 milliónir krónur at byggja.

Hin helvtin av pengunum skal koma frá øðrum almennum og privatum íleggjarum.

Vinnulívsmenninir Niels Mortensen og Tummas  Justinussen standa fyri arbeiðnum at savna saman pengar frá grunnum og privatum íleggjarum.

Sjósavn og mentanarhús

Umframt tær 30 milliónir krónurnar til Føroya Arena, hava føroysku fólkatingsmenninir fingið donsku stjórnina at játta tríggjar milliónir krónur til nýtt samtak millum ung í ríkisfelagsskapinum og tvær milliónir í eykajáttan til sjósavn og mentanarhúsið í Miðvági.