Løgmaður: Vit mugu ásanna, at hetta er sera óheppið

Seinnapartin í dag hevur løgmaður, Bárður á Steig Nielsen, lagt eini boð út á almennu facebook síðuna hjá sær, har hann millum annað sigur at: 

Í Sambandsflokkinum hevur altíð verið siðvenja, at limir í flokkinum hava rætt til egna sannføring í etiskum málum. 
Men fyri at hjúnabandslógin ikki skuldi rullast aftur, var kravið til samgongusamráðingarnar, at samgongan skuldi atkvøða samlað um andstøðuuppskot.
Hendan orðingin í samgonguskjalinum er nú vorðin ein forðing. Hon upphevjar aldargomlu siðvenjuna um, at einhvør tinglimur kann atkvøða eftir egnu sannføring í sokallaðum etiskum málum. 
Vit mugu ásanna, at hetta er sera óheppið.

Føroya Væl, sum er veljarafelagið hjá Sambandsflokkinum í Suðurstreymoy, skipaði í gjárkvøldi fyri limafundi á Gamla Apoteki í Havn.

Johan Dahl, sambandsflokkurin fund á Gamla Apoteki

Johan Dahl, formaður í Føroya Væl, hevur í dag ongar viðmerkingar um, hvat bleiv sagt á fundinum, men sigur, at ein yvirlýsing verður send út í morgin.

Johan Dahl segði við Kringvarpið í gjár, at einki óvanligt er í, at valfelagið hevur limafund, og at hesin fellur saman við ein eftirfylgjandi nevndarfund.

Hann segði, at tað vóru limir í felagnum, sum ynsktu at umrøða politikkin hjá flokkinum og eisini ávís aktuell mál.