- Løgmaður eigur at umhugsa samgonguslit

Føroya Væl, veljarafelagið hjá Sambandsflokkinum í Suðurstreymoy, hevði limafund fríggjakvøldið. Í dag boðar felagið í tíðindaskrivi frá teimum niðurstøðum, ið limirnir eru komnir ásamt um. 

- Flokkurin eigur at vera ein meira modernaður flokkur, sum dregur til sín ungfólk og annars gevur pláss fyri ymiskum sjónarmiðum og virðum, ið avspeglar tíðina vit liva í.

Felagið heldur, at í málinum um sammøður, eiga tinglimir at vera frítt stillaðir at velja eftir egnari sannføring, og vísir á, at hetta hevur verið siðvenjan hjá flokkinum í mong ár. 

Samgongusamstarvið
Føroya Væl vil vera við, at Jenis av Rana undirgravar koronupolitikkin hjá landsstýrinum og hetta eigur at fáa avleiðingar. 

- Løgmaður og formaður í Sambandsflokkinum eiga at taka neyðug stig til, at hetta stegðar beinanvegin og heldur tað fram, ja so skal tað fáa avleiðingar fyri viðkomandi, sum undirgravar koronupolitikkin.

Samstundis leggur veljarafelagið dent á, at tað, ið fór fram í síðstu viku, tá Helgi Abrahamsen fór á fólkating og ikki vildi lata løgtingssessin frá sær ímeðan, ikki má koma fyri.

- Sambandsflokkurin eigur at hava eina skipan sum tryggjar, at okkara eykavaldu sleppa framat til annahvørt Fólkatingið ella Løgtingið, tá ein møguleiki er til tess, skrivar Føroya Væl í tíðindaskrivi.