- Tíðindi, mentan og ítróttur
Bretar ónøgdir við Brexit
Nú tað skjótt er eitt ár, síðani at Bretland fór úr ES, vísir ein stór kanning hjá blaðnum the Guardian, at ein stórur partur av bretum halda, at Brexit hevur gingið illa, ella verri enn tey høvdu væntað.
Av teimum, sum atkvøddu fyri at Bretland skuldi fara úr ES, eru 42 prosent ónøgd við, hvussu tað hevur gingið.
26 prosent halda, at tað hevur gingið verri enn væntað, meðan 16 prosent halda, at tað hevur gingið illa, men at tað hóast alt var væntandi.
86 prosent illa nøgd
Millum tey, sum atkvøddu fyri, at Bretland skuldi vera verandi í ES, halda 86 prosent, at Brexit tilgongdin hevur gingið illa.
Bert 14 prosent av bæði teimum, sum atkvøddu fyri og ímóti, halda, at Brexit tilgongdin hevur gingið væl ella betur enn væntað, sambært kanningini.
Handlarnir hava tað trupult
Serliga handilslívið í Bretlandi hevur verið ávirkað av Brexit, og fleiri hundraðtúsund ES borgarar eru farnir úr Bretlandi, síðani Brexit bleiv veruleiki 1. januar í ár.
Handlar hava havt trupulleikar, og í fleiri umførum hava hillar staðið tómar, tí vørur eru ikki komnar fram vegna nýggjar tollreglur og manglandi lastbilakoyrarar.
Eisini hevur heilsuverkið verið trýst, tí fleiri tilflytararar fluttu úr landinum aftur.