Føroyar skifta ikki lit

Hóast smittutølini eru farin upp um 75 hvønn dag, og Føroyar áttu at blivið reyðar í koronaferðsluljósunum hjá myndugleikunum, so verða Føroyar fyribils gular

Hóast tað eru yvir 75 smittað um samdøgrið, so skifta Føroya ikki lit í koronaferðsluljósunum hjá myndugleikunum

Mynd: Bjarni Árting Rubeksen

Uni L. Hansen

29.12.2021 - 11:03

Smittutølini seinastu dagarnar hava tíverri verið vaksandi.

Í gjár vóru heili 180 nýggir smittutilburðir staðfestir.

Løgmansskrivstovan boðar nú frá, at hetta fyribils ikki fær ávirkan á støðu Føroya í koronaferðsluljósunum hjá myndugleikunum, hóast talið av smittaðum er oman fyri 75 um dagin.

Tað eigur at merkja, at Føroyar nú eru reyðar.

Føroyar eru í løtuni á einum herdum gulum ljósi í koronaskipanini.

Gult koronaljós

Frítekst tagging:

gult

Koronaferðsluljós

Tamarhald á støðuni

Liturin skiftir ikki, tí tamarhald er á støðuni, boðar Løgmansskrivstovan frá í tíðindaskrivinum.

"Í løtuni er tamarhald á trýstinum á sjúkrahúsverkinum, umframt at talið av innleggingum er lágt. Tí er avgjørt fyribils at vera verandi á gula stiginum."

Gjørt verður eisini vart við, at landsstýrið fylgir alla tíðina neyvt við gongdini og hevur leypandi tætt samband við heilsumyndugleikarnar og Farsóttarnevndina.

"Versnar støðan komandi dagarnar, kemur ein nýggj fráboðan," stendur í tíðindaskrivinum.

Eftirmeta markið

Landsstýrið hevur eisini heitt á Farsóttarnevndina um at eftirmeta markvirðini í ferðsluljósskipanini, sum í sínari tíð varð ásett við støði í Delta frábrigdinum.

"Smittustøðan er framvegis álvarsom. Heitt verður á øll um framhaldandi at virða tilmælini," stendur í tíðindaskrivinum frá Løgmansskrivstovuni.

Soleiðis sóu koronaferðsluljósini upprunaliga út.