Endurskoða enn prísir

Hóast Landssjúkrahúsið fekk eina meting um prísirnar hjá Landssjúkrahúsinum í september í fjør, er arbeiðið at endurskoða prísásetingina ikki liðugt enn.

Kaj Leo Holm Johannesen, landsstýrismaður, hevur svarað Eyðgunn Samuelsen, løgtingskvinnu, sum spurdi um prísirnar hjá Landssjúkrahúsinum.

Leiðslan á Landssjúkrahúsinum bað 23.oktober í 2020 grannskoðaravirkið SPEKT um at eina frágreiðing um goymsluna á  Landssjúkrahúsinum.  

Frágreiðingin var handað Landssjúkrahúsinum í september í fjør.

Hon sigur, at Landssjúkrahúsið tekur kanska ov nógv fyri vørurnar, sum tað selur øðrum.

Í hægra lagi

Ábendingar eru um, at prísásetingarnar hjá goymsluni eru í hægra lagi, um sølan eigur at vera útreiðsluneutral. 

Landssjúkrahúsið viðger tilmælini í frágreiðingin, millum annað um prísásetingina, tá keypt verður frá goymsluni á Landssjúkrahúsinum. 

Sambært svarinum verður greiningararbeiðið liðugt stutt eftir summarsteðgin, so endalig støða kann takast tíðliga í heyst. 

Meira enn helvtin innanhýsis

Goymslan á Landssjúkrahúsinum selur 55 prosent innanhýsis á Landssjúkrahúsinum.

Hinir kundarnir eru hini sjúkrahúsini, Almannaverkið og Heilustrygd. 

25 prosent vera løgd omaná prísin, tá selt verður innanhýsis, til dømis til sjúkrahúsini.

Sølan til uttanhýsis viðskiftafólk, eitt nú Almannaverkið, er átta prosent. Tá er prísískoytið 40 prosent.