Illveður í Bretlandi

Rættiligt illveður er í Bretlandi í dag, nú ódnin, Eunice, hevur tikið land. 

Bretski veðurstovnurin, Met Office, boðaði í morgun frá lívshættisligum veðri í London, og bað fólk um at halda seg innandura.

Flogfeløg hava av tí sama avlýst nakrar ferðir, m.a. SAS og British Airways.

Øll flúgving til og úr London er fyribils steðgað, upplýsa bretsku myndugleikarnir.

Bæði í Bretlandi og eisini í Hollandi ávirkar ringa veðrið.

Streymurin farin

Í Írlandi mistu nógv hús í syðra partinum av landinum streymin í morgun, og nógvir skúlar bóðu næmingarnar um at vera við hús.

Í Skotlandi legðist nógvur kavi í illveðrinum, og tað darvar ferðsluni.

Reyða, sum er hægsta ávaringin, varð send út fyri strendurnar í Devon, Cornwall, Somerset og partar av Wales. Seinni kom sama fráboðan fyri Kent, Surrey, Essex og høvuðsstaðin, London.

Í Hollandi er eisini ávaringin reyð, á hægsta stigi, tí illveðrið fer væntandi at raka Holland meint, skrivar NTB.