16 næmingar hava søkt á Heilsuskúlan

16 næmingar hava søkt inn á Heilsuskúla Føroya í Hovi at byrja eftir summarfrítíðina.

Átta ætla at gerast heilsuhjálpari, og átta ætla at gerast námsfrøðihjálpari, sigur Vivi Kirke Davidsen, stjóri.

Hon sigur, at tað hevur verið vanligt, at fólk bíða við at søkja inn á Heilsuskúlan, til tað er liðið longur út á summarið, og tí væntar hon, at fleiri hava søkt, tá vit eru komin út í juni.

Komið í ringt orð

Vivi Kirke Davidsen vísir á, at arbeiðsloysið er lítið, og at tað helst eisini ávirkar áhugan fyri skúlanum.

Og so hevur arbeiðið sum heilsuhjálpari ikki fingið serliga jaliga umrøðu í langa tíð. Tosað hevur heldur verið um vánaliga løn og vánalig arbeiðsviðurskifti. Tað økir heldur ikki um áhugan fyri útbúgvingini, sigur stjórin.

Undirvísa á netinum

Heilsuskúlin er farin undir at menna seg til at undirvísa á netinum fyri at økja um áhugan fyri skúlanum.

Útgerð er fingin til vega, so útbúgvingin til heilsuhjálpara á netinum kann byrja í summar. Men nakrar tekniskar broytingar mugu gerast, sum Mentamálaráðið tekur sær av.

Næsta ár er ætlanin, at eisini námsfrøðihjálparar kunnu fara undir at útbúgva seg um netið, sigur Vivi Kirke Davidsen, stjóri.