Hava savnað 8,3 mió. kr. til Ukraina

Stuðulskonsertin til frama fyri neyðstødd í Ukraina, sum var send í sjónvarpinum í gjárkvøldið, gav tilsamans 8,3 milliónir kr.

Reyði Krossur sigur í tíðindaskrivi:

"Vit vóru tikin á bóli, at undirtøkan fyri tiltakinum var so stór, tá fleiri túsund einstaklingar, fleiri enn 400 fyritøkur, feløg, kommunur, skúlaflokkar og onnur, ið stuðlaðu innsavningini. Við hesum úrsliti fær Reyði Krossur Føroya eitt munandi betri grundarlag at skipa hjálpararbeiði, bæði í Ukraina, í grannalondunum, umframt við Flóttahjálpini her í Føroyum."

Hoyr samrøðu við Jóannes Eidesgaard, formann í Reyða Krossi, í útvarpstíðindum:

Av tí at trýstið á heimasíðuna var so stórt, bar ikki til at nevna øll hesi á lýsingarbreddanum í gjárkvøldið.

Á heimasíðuni hjá Reyða Krossi ber nú til at síggja teir stuðlar, ið ynsktu at verða nevndir, og viðkomandi upphæddir, umframt at tað ber til at síggja sendingina og samlaða úrslitið frá einstaklingum.